ភ្នំពេញ៖ អភិបាលខេត្តអយុធ្យានៅប្រទេសថៃលោក Weerachai Nakmas បានលើកឡើងពីបំណងក្នុងការបង្កើតខេត្តមិត្តភាពជាមួយនឹងខេត្តទេសចរណ៍ណាមួយនៃប្រទេសកម្ពុជាដើម្បីជំរុញកិច្ចសហប្រតិបត្តិការរវាងគ្នានឹងគ្នាទៅវិញទៅមក។

ការលើកឡើងនេះគឺធ្វើឡើងក្នុងពេលដែលប្រធានរដ្ឋសភាកម្ពុជាសម្ដេចរដ្ឋសភាធិបតី ឃួន សុដារី អញ្ជើញធ្វើទស្សនកិច្ចនៅក្នុងខេត្តនេះ ដើម្បីស្វែងយល់អំពីសក្ដានុពលទេសចរណ៍កាលពីថ្ងៃទី១២ ខែកក្កដា ឆ្នាំ២០២៤។

អ្នកនាំពាក្យរងសភាជាតិ លោក កែវ ពិសិដ្ឋ បានឲ្យដឹងថាទាក់ទងទៅនឹងបំណងនេះសម្ដេចប្រធានរដ្ឋសភាថានឹងបញ្ជូនសំណើទៅកាន់រដ្ឋាភិបាលដើម្បីពិចារណា។

លោកថា៖ «សម្ដេចថានឹងនាំសំណើរនេះទៅរាជរដ្ឋាភិបាលដើម្បីពិចារណាសហការគ្នា»។

សម្តេចរដ្ឋសភាធិបតី ឃួន សុដារី និងគណៈប្រតិភូជាន់ខ្ពស់រដ្ឋសភាកម្ពុជា បានធ្វើទស្សនកិច្ចសិក្សាឈ្វេងយល់តំបន់ប្រវត្តិសាស្រ្តនិងទេសចរណ៍ ក្នុងខេត្តអាយុធ្យាប្រទេសថៃនៅថ្ងៃទី២ នៃដំណើរទស្សនកិច្ចផ្លូវការនៅព្រះរាជាណាចក្រថៃ ព្រឹកថ្ងៃទី១២ ខែកក្កដា ឆ្នាំ២០២៤។

សម្ដេចបានអញ្ជើញទស្សនាសារមន្ទីរ និងកន្លែងប្រវត្តិសាស្រ្ត វប្បធម៌ដ៏សំខាន់ៗ នៃខេត្តអាយុធ្យា ភាគកណ្តាលប្រទេសថៃ។

ដំណើរទស្សនកិច្ចនេះធ្វើឡើងនៅក្នុងគោលបំណងសិក្សាឈ្វេងយល់ពីការរៀបចំនិងប្រព្រឹត្តទៅនៃតំបន់ប្រវត្តិសាស្រ្តរបស់ប្រទេសថៃ និងដើម្បីផ្សារភ្ជាប់ទំនាក់ទំនងវប្បធម៌និងខ្សែចង្វាក់ទេសចរណ៍ប្រទេសកម្ពុជានិងប្រទេសថៃឱ្យកាន់តែជិតស្និទ្ធ ហើយក៏ជាឱកាសដល់ការផ្សព្វផ្សាយនិងទាក់ទាញអ្នកទេសចរមកទស្សនាកម្ពុជាផងដែរ៕